ភ្នំពេញ៖ នាយទាហានម្នាក់ដែលជាគ្រូបច្ចេកទេសថ្មើរជើង សាលានាយទាហានសកម្ម វរសេនីយ៍ត្រី ស័ក្កិ៤លោក ពោន ធា ត្រូវបានរដ្ឋមន្ត្រីក្រសួងការពារជាតិលុបឈ្មោះក្រវាត់ចោល ដោយមូលហេតុពាក់ព័ន្ធនឹងការប្រើប្រាស់គ្រឿងញៀន។

នេះបើយើងតាមសេចក្ដីសម្រេចចុះថ្ងៃទី២៩ ខែកញ្ញា ឆ្នាំ២០២៣ ចុះហត្ថលេខាដោយរដ្ឋមន្ត្រីការពារជាតិលោក ទៀ សីហា។

នេះជាសញ្ញាដំបូងហើយបន្ទាប់ពីរដ្ឋាភិបាលអាណត្តិថ្មីចាប់ផ្ដើមមានវិធានការលើមន្ត្រីប្រើប្រាស់គ្រឿងញៀន ខណៈក្រសួងមហាផ្ទៃក៏បានចាប់ផ្ដើមចុះពិនិត្យទឹកនោមលើមន្ត្រីអនុរក្សពន្ធនាគារទូទាំងប្រទេស។

រម្លឹកដល់ល្ងាចថ្ងៃទី១០ ខែសីហា ឆ្នាំ២០២៣ ក្នុងឱកាសជួបជាមួយនឹងសមាជិករដ្ឋាភិបាលអាណត្តិទី៦ និងទី៧ នៅវិមាន៧មករា ក្នុងខណ្ឌចំការមន រាជធានីភ្នំពេញ សម្ដេចតេជោ ហ៊ុន សែន បានស្នើដល់រាជរដ្ឋាភិបាលថ្មី ត្រូវចូលរួមបង្រ្កាបឲ្យខានតែបាននូវការជួញដូរគ្រឿងញៀន បំផ្លាញដល់ឬសគល់នៃឧក្រិដ្ឋកម្មគ្រឿងញៀន។ ក្នុងនោះសម្តេចបានស្នើឲ្យមានការធ្វើកែទម្រង់ដល់អាជ្ញាធរប្រយុទ្ធប្រឆាំងគ្រឿងញៀន ដើម្បីឲ្យសង្គមកម្ពុជាគ្មានគ្រឿងញៀនផងដែរ៕